ວັນທີ 19 ພະຈິກ 2019 ຢູ່ທີ່ຫ້ອງວ່າການແຂວງວຽງຈັນ ໄດ້ເປີດຊຸດຝຶກອົບຮົມ ກ່ຽວກັບວຽກງານຫ້ອງວ່າການຂັ້ນແຂວງ ແລະ ຂັ້ນເມືອງ ໂດຍການເປັນປະທານຂອງທ່ານ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆວຽງຈັນ ແລະ ມີບັນດາພະແນກການ, ຫ້ອງການ, ອົງການຈັດຕັ້ງຂັ້ນແຂວງ, ເມືອງ ເຂົ້າຮ່ວມ, ລວມທັງໝົດ 166 ທ່ານ.

ກອງປະຊຸມຝຶກອົບຮົມວຽກງານຫ້ອງວ່າການແຂວງ ໄດ້ໄຂຂຶ້ນຢ່າງເປັນທາງການ ໃນທ່າມກາງບັນຍາກາດ ທີ່ແຂວງວຽງຈັນຂອງພວກເຮົາ ກຳລັງຂຸ້ມຂ້ຽວໃນການກະກຽມ ແລະ ດຳເນີນກອງປະຊຸມໃຫຍ່ອົງຄະນະພັກເມືອງ, ຄະນະພັກຮາກຖານ ແລະ ໜ່ວຍພັກອ້ອມຂ້າງແຂວງ ເພື່ອຫ້າງຫາກະກຽມຄວາມພ້ອມໃນການດຳເນີນກອງປະຊຸມໃຫຍ່ ຄັ້ງທີ VI ຂອງອົງຄະນະພັກແຂວງ ທີ່ຈະມາຮອດໃນມໍ່ໆນີ້. ກອງປະຊຸມຈະດໍາເນີນໄປເປັນເວລາ 02 ວັນ.

ວຽກງານຫ້ອງວ່າການ ເປັນວຽກງານໜຶ່ງ ທີ່ມີຄວາມສຳຄັນຫຼາຍ ໃນການເຮັດໜ້າທີ່ເປັນເສນາທິການ ທີ່ເອົາການເອົາງານ, ທີ່ຈົງຮັກພັກດີຕໍ່ພັກ, ຕໍ່ປະຊາຊົນ, ເປັນອົງການຈັດຕັ້ງທີ່ເຮັດໜ້າທີ່ໃນການຊ່ວຍວຽກໃຫ້ແກ່ຄະນະພັກ, ອົງການປົກຄອງ ແຕ່ລະຂັ້ນ ຖືເປັນປະຕູດ່ານທຳອິດ ທີ່ບໍລິການຮັບໃຊ້ປະຊາຊົນ-ພົນລະເມືອງ ພ້ອມທັງເປັນອົງການຈັດຕັ້ງທີ່ເຮັດໜ້າທີ່ໃນການປົກປ້ອງ, ປ້ອງກັນຄວາມຖືກຜິດໃນການບໍລິຫານວຽກງານຕ່າງໆ ຊ່ວຍຄະນະພັກ, ອົງການປົກຄອງໃນແຕ່ລະຂັ້ນ; ເປັນອົງການຈັດຕັ້ງທີ່ເຄື່ອນໄຫວພາຍໃຕ້ການຊີ້ນຳ-ນຳພາ ໂດຍກົງຢ່າງມີປະສິດທິຜົນສູງຂອງຄະນະພັກ, ອົງການປົກຄອງໃນແຕ່ລະຂັ້ນ. ການຝຶກອົບຮົມຄັ້ງນີ້, ຖືເປັນຄັ້ງ ທີ່ມີຄວາມໝາຍ ແລະ ຄວາມສຳຄັນທີ່ສຸດຂອງວຽກງານທົ່ວຫ້ອງວ່າການເວົ້າລວມ, ເວົ້າສະເພາະວຽກງານການເປັນເສນາທິການໃຫ້ແກ່ຄະນະພັກແຕ່ລະຂັ້ນ ໃນຊ່ວງໄລຍະການກະກຽມກອງປະຊຸມໃຫຍ່ຂອງຕົນ ເພື່ອນຳເອົາບົດຮຽນໃໝ່ໆໄປໝຸນໃຊ້ເຂົ້າໃນວຽກງານຢ່າງມີປະສິດທິຜົນສູງ.